星級股評家郭思治隆重加盟 打造全新財經頻道

「股壇大隻佬」郭思治(郭sir)之前同耀才(1428)「分手」後,都冇人知佢轉去邊間。唔使估估下,今日民眾金融(279)旗下民眾證券公佈,請到郭Sir加盟,出任董事總經理一職。民眾證券仲講明,會籌辦一個網台製作財經節目,喺民眾證券個App度播放。

郭sir就話,網台以內地同香港觀眾目標比例,會係七比三,所以節目會係普通話、廣東話都有齊,「咁依家有滬港通、深港通,內地投資者係天文數字,所以一定放多啲資源喺內地。」佢話,佢自己啱啱返工,公司租埋中銀40樓全層去做網台,連埋裝修、請人等工作,相信最快要三個月先推出。至於節目方面,佢就話希望做到交易時段全天侯播放,更特別嘅係,除咗有一般傳統財經節目外,「拍大約十集,講吓健身、點樣減肥、點樣Fit啲,我就親自喺鏡頭前示範。」佢話,今朝返到公司,收到好多人祝賀,「我只係覆WhatsApp都覆咗成個幾鐘。」

Share this Post